Manifestación "Asturies decide"

Pola soberania y el cambiu social

Viernes 6 de septiembre de 2013, por Mar

ESTI 8 DE SETIEMBRE, TAMPOCO TENEMOS NADA QUE CELEBRAR

La nuesa tierra asturiana vien soportando dende los años setenta un desaniciu industrial que nos sometió a un estáu de crisis permanente. A los pieslles nos sectores industriales como los astilleros y la siderurxa hai que sumar el fundimientu de les fasteres rurales, nel sector alimentariu: conserveres, lláctees y queseres, cerveces y gaseoses, sidra y dulce, panificadores, … que se sofitaben na producción propia, tanto del campu como de la mar, foron aniquilaes pola gran distribución de productos foriatos. Una gran distribución alimentaría que nesti momentu supera’l 90% del consumu y que foi destruyendo tamién al pequenu comerciu abastecíu por una "aldega” que recibió’l golpe definitivu coles cuotes europees.

Mención estrema merez el desaniciu de la minería, tantu pública como privada que, nes caberes trés décades, pasó de tener más de 40 mil trabayadores a los 3000 qu’apenes tien agora. A esa destrucción de trabayu nes mines, hai que suma-y otros 200 mil empleo inducíos. La delictiva “xestión” institucional, empresarial y sindical del desaniciu de la minería y la so pretendida reconversión al traviés de los multimillonarios “Fondos Mineros” que tendría de ser investigada pa delimitar les responsabilidaes de los axentes implicaos, convirtió n’ermos comarques enteres.

Nun se trata de faer un fetiche d’esta dómina d’industrialización paternalista, nun queremos recuperar una industria contaminante, tal como pretende facese en Salave cola construcción de les mines d’oru, queremos un empléu ecolóxicamente caltenible que permita’l desendolcu equilibráu d’una Asturies cada vuelta más aprobetada con cerca de 100.000 paraos y paraes.

Amás d’un sometimientu económicu, Asturies vese social y culturalmente afogada en polítiques sucursalistes que refuguen la identidá propia del nuesu pueblu, el nuesu patrimoniu cultural y llinguisticu ye costantemente zurdíu por una falta d’interés na so recuperación y caltenimientu, una amuesa d’ello ye qu’entá, nengún gobiernu foi capaz de reconocer la oficialidá de la llingua asturiana.

Nos alcontramos frente a una crisis sistémica: económica, ecolóxica, social y de los cuidos, que’l mesmu capitalismu ta reconvirtiendo nun nuevu negociu, cola so guerra declarada al pueblu trabayador, robándonos los salarios, les pensiones, la sanidá, la educación, la cultura,… solo ufierta austeridá y retayos pa los y les d’abaxu y ayudes ensin llende a la banca, millones d’euros destinaos a rescates que xeneraron una delda soberana, ¡y pretenden que la paguemos nós!. Austeridá y retayos que la Troika (FMI, UE y BCE) encamienta siguir afondando, ensin importa-yos la destrucción social sobrevenida pa esta Asturies de la que los mozos y les moces, con un índiz de paru de casi’l 60%, se ven obligaos a emigrar.

Izquierda Anticapitalista Asturies sumase a esta manifestación pa dexar claro la so apuesta pola soberanìa de los pueblos, cada cual debe tener derechu a gobernase como meyor decida, y pa reivindicar la construcción d’alternatives dende abaxo, construyides polos diferentes sectores en llucha, polos diferentes movimientos y partíos que cada día lluchamos na cai.

Nos caberos dos años de grandes movilizaciones, cola incorporación de nuevos sectores, se ta abriendo un camín que debemos afondar y ampliar, pa ello ye necesaria la confluencia de los diferentes sectores políticos y sociales, n’espacios comunes d’alderique y acción que permitan desendolcar un programa d’emerxencia sobre’l que construyir esa alternativa.

Baltar al gobiernu de Rajoy na cai y dende abaxu, tien que ser el preludiu de la construcción d’una alternativa política que ruempa coles intenciones de la Troika, l’austeridá y los retayos, abriendo’l camín haza procesos constituyentes basaos na soberanía popular, que xeneren otru modelu políticu, acorde colos intereses del pueblu trabayador.

ASTURIES DECIDE. SOBERANÍA Y CAMBIU SOCIAL

PDF - 417.5 KB
Manifiesto Asturies decide
SPIP | esqueleto | | Mapa del sitio | Seguir la vida del sitio RSS 2.0